भक्तपुर । भक्तपुरको मनहरा क्षेत्रमा वैकल्पिक व्यवस्थापनबिना हटाइएका सुकुमबासी परिवारले तत्काल पुनर्स्थापनाको माग गर्दै कोणसभा गरेका छन् । संयुक्त राष्ट्रिय सुकुमबासी मोर्चा नेपाल, काठमाडौं उपत्यका विशेष समितिको आयोजनामा भएको सभामा विस्थापित परिवारलाई भूस्वामित्वसहित स्थायी पुनर्स्थापना, घरटहरा तथा सामानमा भएको क्षतिको क्षतिपूर्ति र समयसीमासहितको पुनर्स्थापना योजना सार्वजनिक गर्न माग गरिएको छ । मोर्चाले भदौ १२ गतेसम्म माग सम्बोधन नभए अनिश्चितकालीन शान्तिपूर्ण सत्याग्रह सुरु गर्ने चेतावनी दिएको छ । साथै भूमिहीन तथा सुकुमबासीको लगत संकलन, प्रमाणीकरण, नापजाँच र निस्सा वितरण प्रक्रिया तत्काल अघि बढाउन सरकारसँग आग्रह गरेको छ । मोर्चाले भदौ ४ गते माइतीघर मण्डलामा खबरदारी सभा र भदौ ७ गते नागरिक समाज, राजनीतिक दल, मानवअधिकारकर्मी तथा कानुन व्यवसायीसहितसँग अन्तरक्रिया गर्ने जनाएको छ । यसैबीच नेपाली कांग्रेसका निवर्तमान सभापति शेरबहादुर देउवा साउन २८ गते दिउँसो १२ बजे नेपाल फर्किने भएका छन् । कांग्रेस नेता मीन विश्वकर्माले देउवाको स्वदेश फर्किने समय तय भएको बताएका छन् । स्वास्थ्य परीक्षण तथा उपचारका लागि विदेशमा रहेका देउवा सिंगापुर हुँदै हाल हङकङमा छन् । नेपाल फर्किएपछि देउवाले कांग्रेसको संस्थापन इतर समूहले साउन २९ गते काठमाडौंमा आयोजना गर्ने राष्ट्रिय भेलालाई सम्बोधन गर्ने कार्यक्रम रहेको छ । यसैबीच, देउवा नेपाल फर्किएपछि उनीविरुद्ध कुनै मुद्दा वा पक्राउ पुर्जी भए–नभएकोबारे प्रहरीले रेकर्ड जाँच गरिरहेको जनाएको छ । प्रहरी प्रवक्ता अविनारायण काफ्लेले आवश्यकताअनुसार कारबाही प्रक्रिया अघि बढाइने बताएका छन् । त्यसैगरी नेपाली कांग्रेसका नेता तथा पूर्वउपप्रधानमन्त्री विमलेन्द्र निधिले वर्तमान राजनीतिक परिस्थितिमा कांग्रेसले जिम्मेवार र परिपक्व भूमिका निर्वाह गर्नुपर्ने बताएका छन् । कांग्रेस धनुषाद्वारा जनकपुरधाममा आयोजित अन्तरक्रिया कार्यक्रममा उनले लोकतान्त्रिक मूल्यमान्यता र संविधान रक्षा तथा जनताको अधिकारको पक्षमा पार्टीको नेतृत्व जिम्मेवार र परिपक्व भूमिकामा उभिनुपर्ने बताएका छन् । पार्टीलाई थप सुदृढ र एकताबद्ध बनाउँदै अघि बढ्नुपर्नेमा जोड दिँदै नेता निधिले पार्टीका नेता कार्यकर्ताबीचको एकता र सङ्गठनको सक्रियतामा निर्भर रहने भएकाले सबै मिलेर सङ्गठनलाई प्रभावकारी बनाउनुपर्ने बताएका छन् । पार्टीभित्रको एकता, सङ्गठन सुदृढीकरण र जनतासँगको सम्बन्धलाई केन्द्रविन्दुमा राखेर अघि बढ्नुपर्ने बताउँदै उनले जनताको समस्या र अपेक्षालाई नजिकबाट बुझेर त्यसअनुरूप राजनीतिक गतिविधि अघि बढाउनुपर्ने सुझाव दिएका छन् । त्यस्तै नेकपा (एमाले) का महासचिव शंकर पोखरेलले लोकप्रियतावाद, अराजकतावाद र अवसरवादको जगमा खडा भएका शक्तिहरूले देशका मूल समस्या समाधान गर्न नसक्ने बताएका छन् । एमाले तारकेश्वर नगर कमिटीले काठमाडौंमा आयोजना गरेको कार्यक्रममा महासचिव पोखरेलले नेपाली राजनीतिमा लोकप्रियतावाद, अराजकतावाद र अवसरवादको जगमा खडा भएको वैकल्पिक शक्तिले देशका समस्याहरूलाई सम्बोधन र समाधान गर्न नसक्ने बताएका हुन् । उनले अहिलेको वैकल्पिक शक्तिबाट मुलुकको सार्वभौमसत्ता नै समाप्त हुने चुनौती समेत देखिएको उल्लेख गरेका छन् । महासचिव पोखरेलले नयाँ वैकल्पिक शक्तिमा व्यवस्थित सोच, विचार, योजना र चिन्ता नदेखिएकाले उनीहरू नेपाली राजनीतिमा लामो समय नटिक्ने दाबी गरेका छन् । यस्तो अवस्थामा असन्तुष्ट मतदातालाई स्वतः पुरानै पार्टीमा फर्काउनका लागि विगतका कमजोरीहरू लुकाउनुको सट्टा जनतामाझ गएर आफ्ना गल्ती–कमजोरी स्वीकार गर्ने र सच्चिने प्रतिबद्धता जनाउनुपर्ने उनले बताएका छन् ।
