– अर्जुननरसिंह के.सी. –
२००७ सालमै बिराटनगरको लडाईमा दमन गर्न तीनसय नेपाली सेनालाई राणाहरुले काठमाडौबाट कोशी तारेर इनरुवाबाट विराटनगरतर्फ बढाउँदा कुलदीप झा नामक भारतीय समाजवादी, जो नेपालमै धेरैजसो बसोबास गदर्थे, उनले अदम्य साहसका साथ आफूसँग भएको राइफल चलाएर सेनालाई तितरबितर पारेका थिए । धेरै सैनिकहरुले आफ्ना हतियार छोडेर भाग्नुपरेको थियो । कुलदीप झा नेपाली सेनाबाट मारिए । वीरताका यस्ता धेरै सत्यकथाहरु तराईमा नेपाली काँग्रेससँगै छन् ।
नेपाली काँग्रेसको राजनीतिमा लागेर पार्टी महामन्त्री हुँदै मुलुकको पहिलो राष्ट्रपति हुनुभएका चिकित्सा व्यवसायी डा रामवरण यादव, सत्तामा मधेसीको पहुँच, प्रभाव र गौरव नाप्ने प्रमाण पनि हुनुभएको छ । तुर्सा हेम्रम झापा र मोरङमा बसोबास गर्ने तराईका आदिबासी सन्थाल सतार जातिका सर्वमान्य काँग्रेस नेता हुनुहन्थ्यो । त्यो बेला ९० प्रतिशत सन्थालहरु नेपाली काँग्रेसका समर्थक तथा मतदाता थिए ।
सद्भावना पार्टीका संस्थापक अध्यक्ष स्व. गजेन्द्रनारायण सिंह नेपाली काँग्रेसमै रहेर केन्द्रीय नेतृत्वमा पुग्नुभएको व्यक्तित्व हुनुहुन्थ्यो । २०१७ सालमा राजा महेन्द्रले प्रजातन्त्रविरोधी कदम चलाएपछि भारतको पटनामा भएको नेपाली काँग्रेसको सम्मेलनले सुवर्ण शम्शेर कार्यवाहक सभापति हुनुभयो र उहाँले गजेन्द्रनारायण सिंह लगायत काशीप्रसाद श्रीवास्तव, सत्यनारायण मल्लिक र भागवत यादव गरी चारजनालाई २६ सदस्यीय केन्द्रीय समितिमा समावेश गर्नुभयो । पञ्चायतकालमा डा हर्क गुरुङको आप्रवासन तथा बसाईसराई सम्बन्धी प्रतिवेदनबाट मधेसी समाजमा असुरक्षाबोध र उत्तेजना फैलिएपछि उहाँले सद्भावना परिषद् स्थापना गर्नुभयो । २०४६ पछि सो परिषदलाई उहाँले पार्टी बनाउनु भयो र उहाँ काँग्रेसबाट बाहिरिनु भयो ।
२०३३ सालमा महोत्तरी नेपाली काँग्रेसको जिल्ला सभापति हुँदै २०४८ सालमा सांसद निर्वाचित भएका, एकपटक मन्त्री हुनुभएका स्व. महेश्वरप्रसाद सिंह नेपाली काँग्रेस र तराई क्षेत्रमा विशेष लोकप्रिय नेताका रुपमा हुनुहुन्थ्यो । बीपी कोइराला, सुवर्ण शम्शेर र भारतीय सर्वोदय नेता जयप्रकाश नारायणका सद्गुणबाट प्रेरित तथा प्रभावित एक शालिन र भद्र नेताको रुपमा उहाँलाई सबैले श्रद्धापुर्वक सम्झिने गर्दछन् । २००९ सालदेखि नै नेपाली काँग्रेसमा निष्ठापूर्वक आवद्ध गान्धीवादी नेता स्व. महेन्द्रनारायण निधि पार्टीमा महामन्त्री र २०४७ सालको संक्रमणकालमा मन्त्री हुनुभएको थियो । २००९ सालमा जनकपुरमा भएको पाँचौ तथा स्वदेशभित्रको पहिलो राष्ट्रिय महाधिवेशनबाट बीपी सभापति निर्वाचित भएपछि केन्द्रीय समितिमा मनोनित गरेर पार्टीमा पहिलो पटक मधेसीलाई नेतृत्वपंक्तिमा राख्नुभयो । तर २०१२ सालमा भएको वीरगञ्ज महाधिवेशनपछि रामनारायणमात्र पार्टीको केन्द्रीय समिति सदस्यमा मनोनित हुनुभएको थियो ।
२०१५ सालको पहिलो आम निर्वाचनमा तराईबाट निर्वाचित केही नेताहरुमध्ये सप्तरीबाट डा नागेश्वरप्रसाद सिंह, सप्तरी पश्चिम बाट सूर्यनाथ दास यादव, सिराहाबाट देवनाथ दास यादव, क्रमशः
