– डा. तुलसी भट्टराई/उद्धव उपाध्याय/महेन्द्रप्रकाश सिवाकोटी –
संसदमा उत्पन्न गतिरोध हटाउने सिलसिलामा धेरैपटक औपचारिक बैठकमा पनि बसियो । त्यतिञ्जेल पनि गिरिजाबाबु विराटनगरमै हुनुहुन्थ्यो, काँग्रेसको जिल्ला सभापति । पार्टीको काममा साइकल चढेर झापा, मोरङ, सुनसरी घुम्छन् भन्ने हल्ला पूर्वमा थियो ।
राजाले २०१७ पुसमा कोइराला परिवारका धेरैलाई पक्राउ गरे गिरिजाबाबु पनि जेल परे । पञ्चायतमा तुलसी गिरिपछि म प्रधानमन्त्री भएँ । आमरण अनसन गरेर गिरिजाबाबु छुटे । २०२४ सालमा गिरिजाबाबुसँग पहिलो भेट भयो । उहाँ वीपीलाई जसरी पनि छुटाउनु पर्यो भन्ने अभियानमा हुुनुहुन्थ्यो । म प्रधानमन्त्री र गिरिजाबाबु दाजुलाई जेलमुक्त गर्न हिँडेको भाइ, मसँग धेरै पटक अन्तरङ्ग छलफल गर्नुभयो । आफूभन्दा बीपीबारे धेरै चिन्तित, इमान्दार भाइ र बफादार काँग्रेस, काँग्रेसका टपलिडर जेलमा थिए । बीपीलाई छुटाउन उहाँले राजा महेन्द्रलाई भेट्नुभयो । भेटघाट मिलाइदिन मेरो पनि सहयोग छ । पुस्तौनी सम्बन्धको विश्वासले नै गिरिजाबाबुले मन फुकाएर मसँग सहयाग मागेजस्तो लाग्छ ।
बाउबाजेको पालादेखि सम्बन्ध भएकाले राजनीतिक भेटघाट पनि पारिवारिकझै भयो । मेरो दाइहरुसँग कोइराला परिवारका सबै सदस्यको हिमचिम थियो । दुई परिवारको घनिष्ठताबारे गिरिजाबाबु म जत्तिकै जानकार रहेको पहिलो भेटघाटमै प्रष्ट थियो । विराटनगरको खेतीपाती र मौजामा बाली भित्र्याउन जाँदा मेरा दाजुहरु कोइराला निवास पुगेकै हुन्थे । विराटनगरमा थापा निवास रहेको जग्गा जमीन हामीले गिरिजाबाबुहरुकै किनेका हौ । कोइराला परिवारको जमिनदारी किनेपछि सम्बन्ध झनै गाढा भयो । हामीहरुबीच विश्वास र भरोसा अपार थियो । यहाँसम्म कि गिरिजाबाबुहरुको दाजुभाईको अंशवण्डा नै मेरा बुबाले गरिदिनुभएको हो । पाँचै दाजुभाइले मेरो बुबाले लगाइदिएको अंशवण्डा सहर्ष स्वीकारेका थिए ।
प्रधानमन्त्रीका रुपमा पञ्चायत जोगाउनु मेरो कर्तव्य हो । क्रमशः
